Mahaka yatoa hukumu ya Kesi ya talaka ya kusaka mgawanyo Mali ,wadai ndoa ni Batili

Kutoka Mahakamani

Mahakama yatoa hukumu ya Talaka yadai  talaka inayodaiwa ni batili ,Siyo ya Mke wa Kisheria mgawanyo wa mali wagonga mwamba

Na Mwandishi wetu

MAHAKAMA ya Mwanzo Mbagala, Dar es Salaam imesema haiwezi kumuamuru Mmiliki wa  shule  nne za Shule za Sekondari, St Mathew na St Marks ,Thadei Mtembei kutoa talaka kwa Magreth Mwangu kutokana na ndoa yao kuwa batili

Akisoma hukumu hiyo leo, Hakimu Rajab Tamambele alisema ndoa aliyofunga Mwangu pamoja na Mtembei ambayo ni ya kimila ni batili kwa kuwa mdai hakutoa cheti cha ndoa hiyo ilipofungwa

Alisema kwa misingi hiyo, mahakama haiwezi kumuamuru Mtembei kutoa talaka kwani aliwasilisha cheti cha ndoa ya mke mmoja aliyoifunga mwaka 1985

mahakama hiyo haiwezi kugawa mali kama ambavyo mdai ameiomba mahakama, ambapo amesisitiza kuwa mgawanyo wa mali unatokana na ndoa halali ambayo baba na mama wanaishi pamoja.

‘’Mashahidi wote wameeleza kuwa Mtembei na Mwangu walikuwa wanakutana hoteli ya Sleep Inn. Kwa hivyo mahakama inaona kuwa uhusiano kati ya mdai na mdaiwa ulikuwa wa kimapenzi pekee au hawara na kwa lugha ya kistaarabu tunaita mzazi mwenzie,’’ aliongeza Tamambele.

 Alifafanua kuwa kulipa mahari ambapo mdai aliieleza mahakama kuwa alitolewa ng’ombe watano, sio njia ya kufunga ndoa bali ni kuelekea kufunga ndoa.

Aliendelea kusema kuwa kitendo cha baba kupewa mahari akiwa peke yake bila ya kuwa na mzee wa kabila hilo kuthibitisha, sio sahihi katika sheria za ndoa.

Akisoma hukumu hiyo kwa saa moja, Hakimu Tamambele alisema kuwa watoto watatu kati ya Mtembei na Mwangu wamezaliwa nje ya ndoa, hivyo mahakama haiwezi kuamuru watoto hao kupatiwa matunzo.

‘’Mdaiwa anatakiwa kushukuru kitendo cha mdai kujenga nyumba tatu kwa ajili ya watoto kwani wengine hawawezi kufanya kitu kama hicho. Kila mzazi anatakiwa kuwatunza watoto hao, ’’ alisema.

Akizungumzia kuwakilishwa kwa mdaiwa, alisema kwa mujibu wa sheria ya kama mdaiwa ni mgonjwa anaweza akawakilishwa ambapo mtoto wake, Peter ndiye alichukua nafasi ya kumuwakilisha baba yake.

Aidha, alisema haki ya kukata rufaa kwa mdai iko wazi na kwamba inatakiwa kukatwa kwa siku 45.

Katika kesi hiyo ambayo ilifunguliwa Juni 5, mwaka huu, Mwangu aliiomba mahakama kumuamuru mdaiwa kutoa talaka, matunzo ya watoto na ya machumo ya pamoja yenye thamani ya Sh milioni 800.

Alisema kesi hiyo ilikuwa na jumla ya mashahidi nane ambapo watano kutoka upande wa mdai na watatu upande wa mdaiwa.

 
Mdai katika kesi hiyo  alifungua kesi kupitia ofisi ya Ustawi wa jamii na ilipoanza kusikilizwa mdai alisema walianza mahusiano mwaka 1995 ambapo walizaa watoto watatu na walijenga shule nne, nyumba pamoja na hoteli tatu za Dar es Salaam na Bukoba

Watoto yatima Patandi waomba wadau wa Maendeleo kuwasaidia mahitaji ya msingi kukabiliana na mazingira duni

Watoto  wanaotunzwa na Kituo cha watoto yatima Patandi wakiwa katika moja ya hafula ya chakula cha pamoja na wadau wa maendeleo  wa Halmashauri ya Meru,waomba  jamii iwasaidie kukabiliana na hali duni ya maisha

MAUAJI YA KINYAMA YATOKEA ARUSHA ,MTU MMOJA ACHINJWA KAMA KUKU

MAUAJI ya kutisha yametokea  katika hotel ya kitalii ya A. Square Belmont maarufu kwa jina la A.M iliyopo katikati ya jiji la Arusha,baada ya mtu asiyefahamika wa jisi ya kiume kukutwa amechinjwa kama kuku na kuondolewa viungo vyake kikiwemo kichwa ,viganja vya mikono na sehemu za siri.

Tukio hilo la kusikitisha limegundulika leo  majira ya asubuhi  na wahudumu
wa hotel hiyo walipofika katika chumba alichokodi marehemu kwa lengo la
kukifanyia usafi.



Taarifa zinadai kuwa marehemu alifika katika hotel hiyo agost 29 mwaka huu
na kukodi chumba kimoja wapo gorofa ya pili na kulipia siku mbili zaidi
,hata hivyo juzi agost 30 aliongeza siku moja zaidi hadi tarehe agost 31.



Moja wa wahudumu katika hotel hiyo ambaye hakutaka kutaja jina lake alidai
kuwa marehemu wakati anapatiwa chumba hicho alikuwa mwnyewe na kuandikisha
jina moja akidai anatokea wilayani Karatu akifanyakazi ya Ualimu.


“Asubuhi ya leo mhudumu alienda kufanya usafi katika vyumba vya wateja na
walipo fika chumba cha marehemu walijaribu kukifungua na kukikuta kiko wazi
na walipo jaribu kuingia ndani ya chumba hicho ndipo walipoona mwili wa
marehemu ukiwa utupu umelazwa kifudi fudi katika bafu la chumba hicho huku
michirizi ya damu ikiwa pembeni ” alisema mhudumu huyo.



Aidha kufuatia tukio hilo uongozi wa hotel ulitoa taarifa kituo cha polisi
na polisi walifika na kuchukua mwili huo hadi chumba cha kuifadhia maiti
kilichopo hospitali ya mkoa Mount Meru .



Hata hivyo kabla ya kuchukuliwa mwili huo , polisi walitumia masaa matano
kuwahoji wahudumu wa hotel hiyo  kufanya uchunguzi wa kina zaidi kuhusiana
na tukio hilo

Uongozi wa hotel hiyo haukuwa tayari kuzungumzia tukio hilo na muda mwingi
walionekana  kujifungia katika vyumba maalum kukwepa waandishi wa habari


Kamanda wa polisi mkoa wa Arusha Liberatusi Sabasi alithibitisha tukio hilo
na kueleza kuwa atalitolea ufafanuzi hapo baadae,


Tukio hilo linahusishwa na ushirikina na hakuna anayeshikiliwan kuhusiana
na tukio hilo na kwamba baada ya mauaji hayo wauaji waliondoka na nguo za
marehemu pamoja na viungo vyake kikiwemo kichwa.

habari kwa hisani ya libeneke la kaskazini blog

SERIKALI KUZINGATIA USHAURI WA RIPOTI YA ESRF YA MAENDELEO YA BINADAMU

Mkurugenzi Mtendaji wa Taasisi ya Utafiti wa Kiuchumi na Kijamii (ESRF), Dk. Tausi Kida (katikati) akimlaki Mgeni rasmi Waziri wa Nchi, Ofisi ya Waziri Mkuu, Tawala za Mikoa na Serikali za Mitaa (TAMISEMI), Mh. Hawa Ghasia (kushoto) mara baada ya kuwasili katika hoteli ya Ngurdoto jijini Arusha kufungua warsha ya uwasilishwaji wa ripoti ya Maendeleo ya Binadamu Tanzania ya Mwaka 2014 iliyoandaliwa na Taasisi ya Utafiti wa Kiuchumi na Kijamii (ESRF) chini ya ufadhili wa Shirika la Maendeleo la Umoja wa Mataifa (UNDP). Kulia ni Mratibu Mkazi wa Mashirika ya Umoja wa Mataifa na Mwakilishi wa Shirika la Maendeleo (UNDP) nchini, Alvaro Rodriguez. (Picha zote na Zainul Mzige wa Modewjiblog)

Mgeni rasmi Waziri wa Nchi, Ofisi ya Waziri Mkuu, Tawala za Mikoa na Serikali za Mitaa (TAMISEMI), Mh. Hawa Ghasia (kushoto) akiwa ameongozana na Mkurugenzi Mtendaji wa Taasisi ya Utafiti wa Kiuchumi na Kijamii (ESRF) Dk. Tausi Kida (katikati) pamoja Mratibu Mkazi wa Mashirika ya Umoja wa Mataifa na Mwakilishi wa Shirika la Maendeleo (UNDP) nchini, Alvaro Rodriguez kuelekea sehemu maalum ya mapumziko kabla ya kuingia katika ukumbi wa mikutano.

Mkurugenzi Mtendaji wa Taasisi ya Utafiti wa Kiuchumi na Kijamii (ESRF), Dk. Tausi Kida akifafanua jambo kuhusu warsha ya uwasilishwaji wa ripoti ya Maendeleo ya Binadamu Tanzania ya Mwaka 2014 iliyoandaliwa na ESRF kwa mgeni rasmi (aliyeipa mgongo kamera) na meza kuu kabla ya kuingia kwenye ukumbi wa mikutano.

Mgeni rasmi Waziri wa Nchi, Ofisi ya Waziri Mkuu, Tawala za Mikoa na Serikali za Mitaa, Mh. Hawa Ghasia akitoa hotuba ya ufunguzi wa warsha ya uwasilishaji wa Ripoti ya Maendeleo ya Binadamu Tanzania ya Mwaka 2014 kwa Viongozi wa Mikoa na Wilaya iliyofanyika jijini Arusha katika hoteli ya Ngurdoto.

Mkurugenzi Mtendaji wa Taasisi ya Utafiti wa Kiuchumi na Kijamii (ESRF) Dk. Tausi Kida (katikati) pamoja Mratibu Mkazi wa Mashirika ya Umoja wa Mataifa na Mwakilishi wa Shirika la Maendeleo (UNDP) nchini, Alvaro Rodriguez wakifuatilia kwa ukaribu hotuba ya mgeni rasmi (hayupo pichani).

Mkurugenzi Mtendaji wa Taasisi ya Utafiti wa Kiuchumi na Kijamii (ESRF), Dk. Tausi Kida akitoa neno la ukaribisho kwa washiriki wa warsha ya uwasilishwaji wa ripoti ya Maendeleo ya Binadamu Tanzania ya Mwaka 2014 iliyoandaliwa na Taasisi ya Utafiti wa Kiuchumi na Kijamii (ESRF) chini ya ufadhili wa Shirika la Maendeleo la Umoja wa Mataifa (UNDP).

Mratibu Mkazi wa Mashirika ya Umoja wa Mataifa na Mwakilishi wa Shirika la Maendeleo (UNDP) nchini, Alvaro Rodriguez akizungumza katika warsha ya uwasilishwaji wa ripoti ya Maendeleo ya Binadamu Tanzania ya Mwaka 2014 na Wakuu wa mikoa, wilaya pamoja na Makatibu Tawala wa mikoa iliyofanyika katika hoteli ya Ngurdoto jijini Arusha.

Naibu Mkurugenzi Mkazi, Shirika la Maendeleo la Umoja wa Mataifa (UNDP) nchini, Amon Manyama akiwasilisha mada ya Mageuzi ya kiuchumi yanayoendelea: kuangalia zaidi ukaji wa uchumi wakati wa warsha ya uwasilishwaji wa ripoti ya Maendeleo ya Binadamu Tanzania ya Mwaka 2014 iliyoandaliwa kwa Wakuu wa mikoa, wilaya pamoja na Makatibu Tawala wa mikoa katika hoteli ya Ngurdoto jijini Arusha.

Mkuu wa mkoa wa Singida, Dkt. Parseko Kone (kushoto) wakifuatilia kwa umakini na viongozi wenzake wakati mada mbalimbali zizokuwa zikiwasilishwa kwenye warsha ya uwasilishwaji wa ripoti ya Maendeleo ya Binadamu Tanzania ya Mwaka 2014 iliyoandaliwa na Taasisi ya Utafiti wa Kiuchumi na Kijamii (ESRF) chini ya ufadhili wa Shirika la Maendeleo la Umoja wa Mataifa (UNDP) kwa Wakuu wa Mikoa, Wilaya pamoja na Makatibu Tawala wa Mikoa jijini Arusha.

Pichani juu na chini ni Wakuu wa Mikoa, Wilaya pamoja na Makatibu Tawala wa Mikoa waliohudhuria warsha ya uwasilishwaji wa ripoti ya Maendeleo ya Binadamu Tanzania ya Mwaka 2014 iliyoandaliwa na Taasisi ya Utafiti wa Kiuchumi na Kijamii (ESRF) chini ya ufadhili wa Shirika la Maendeleo la Umoja wa Mataifa (UNDP).

Mkurugenzi Mtendaji wa Taasisi ya Utafiti wa Kiuchumi na Kijamii (ESRF), Dk. Tausi Kida (kushoto) katika picha ukumbusho na Mkuu wa Mkoa wa Dodoma, Chiku Galawa (katikati) na Mkuu wa wilaya ya Urambo mkoani Tabora, Queen Mlozi (kulia).

Mkuu wa wilaya ya Mvomero, Betty Mkwasa (kushoto) katika picha ya ukumbusho na Mkuu wa Wilaya ya Temeke, Sophia Mjema nje ya ukumbi wa mikutano Ngurdoto Mountain Lodge.

Pichani juu na chini Mgeni rasmi Waziri wa Nchi, Ofisi ya Waziri Mkuu, Tawala za Mikoa na Serikali za Mitaa (TAMISEMI), Mh. Hawa Ghasia na meza kuu katika picha ya pamoja na Wakuu wa Mikoa na Wilaya pamoja na Makatibu Tawala wa Mikoa waliodhuria warsha ya uwasilishwaji wa ripoti ya Maendeleo ya Binadamu Tanzania ya Mwaka 2014 iliyoandaliwa na Taasisi ya Utafiti wa Kiuchumi na Kijamii (ESRF) chini ya ufadhili wa Shirika la Maendeleo la Umoja wa Mataifa (UNDP).

Mgeni rasmi na meza kuu katika picha ya pamoja na baadhi ya wafanyakazi wa Taasisi ya Utafiti wa Kiuchumi na Kijamii (ESRF).

Mkurugenzi Mtendaji wa Taasisi ya Utafiti wa Kiuchumi na Kijamii (ESRF), Dk. Tausi Kida akiteta jambo na mgeni rasmi Waziri wa Nchi, Ofisi ya Waziri Mkuu, Tawala za Mikoa na Serikali za Mitaa (TAMISEMI), Mh. Hawa Ghasia mara baada ya zoezi la picha ya pamoja.

Na Mwandishi wetu, Arusha

SERIKALI imesema itazingatia ushauri uliotolewa katika Ripoti ya Maendeleo ya Binadamu ya Tanzania ya Mwaka 2014 iliyowasilishwa kwa Viongozi wa Mikoa na Wilaya katika warsha yao iliyofanyika Ngurdoto, Arusha.

Kauli hiyo imetolewa na Waziri wa Nchi, Ofisi ya Waziri Mkuu, Tawala za Mikoa na Serikali za Mitaa, Mh. Hawa Ghasia wakati akifungua warsha yenye lengo la kujadili na kuielewa.

Ripoti hiyo ambayo imejadiliwa kama “Mageuzi ya Kiuchumi kwa Maendeleo ya Binadamu” ilizinduliwa rasmi mwezi machi mwaka huu wa 2015 inawasilishwa kutokana na haja ya viongozi hao kutambua yaliyomo na namna ya kusonga mbele katika mipango ya baadae.

Ripoti hiyo ambayo ni matokeo ya utafiti wa Taasisi ya Utafiti wa Kiuchumi na Kijamii (ESRF) imelenga kusaidia kufahamu yaliyomo katika ripoti hiyo ili kuwawezesha viongozi hao kupata uelewa mpana juu ya dhana hii ya masuala ya Maendeleo ya Binadamu.

Warsha hiyo imewezesha na Shirika la Maendeleo la Umoja wa Mataifa (UNDP).

Ghasia alisema utafiti huo umelenga kuzijengea uwezo mamlaka za mikoa na serikali za mitaa ili kuziwezesha kutoa huduma bora kwa wananchi.

Ripoti hiyo ambayo imezungumzia masuala ya mageuzi ya kiuchumi kwa Maendeleo ya Binadamu imetafakari kwa undani namna ya kufanya mageuzi ya kiuchumi katika taifa ili kuleta maendeleo ya Binadamu.

Akizungumzia maendeleo alisema mwanzoni mwa karne ya 21, mataifa mengi ya kiafrika yalitengeneza Dira za Maendeleo kuwa mwongozo wa ujenzi wa uchumi na maendeleo.

“Kwa upande wa taifa letu, Dira ya Maendeleo ya mwaka 2025 inalenga katika kulifanya taifa letu kuwa nchi ya uchumi wa kati wenye kutegemea zaidi sekta ya viwanda na huduma.

“ Kwa maneno mengine, Dira ya Maendeleo ya Taifa 2025 inalenga siyo tu katika ukuzaji wa uchumi bali kubadilisha muundo wa uchumi; kwa miaka mingi uchumi wa Taifa letu umekuwa unategemea zaidi kilimo ambacho kina tija ndogo.” alisema Ghasia.

Alisema kwamba Sera za Maendeleo ya taifa letu tangu uhuru zimekuwa zikiweka kipaumbele katika dhana ya Maendeleo ya Binadamu.

“Kwa mfano, Azimio la Arusha la mwaka 1967, ambalo liliamua taifa lifuate mfumo wa ujamaa na kujitegemea lilielekeza kwamba sera, mipango na mikakati yote lazima zizingatie uboreshwaji wa maisha ya watu kwani lengo la maendeleo ni watu.” Alisema.

Naye Mkurugenzi Mtendaji wa ESRF, Dkt. Tausi Kida akizungumzia warsha hiyo alisema kwamba utafiti huyo uliofanywa na taasisi yake uliwezekana kwa kushirikiana na Wizara ya Fedha, Shirika la Maendeleo la Umoja wa Mataifa (UNDP), Chuo Kikuu cha Dar es Salaam (Idara ya uchumi), Ofisi ya Taifa ya Takwimu (NBS) na ofisi ya Mtakwimu Mkuu wa serikali ya Zanzibar.

Alisema Toleo hilo la Ripoti ya Maendeleo ya Binadamu ya Tanzania ya 2014 ni toleo la kwanza nchini.

Naye Mratibu wa Mashirika ya Umoja wa Mataifa yaliyopo hapa nchini na Mkurugenzi Mkazi wa Shirika la Maendeleo (UNDP), Alvaro Rodriguez, alizungumzia umuhimu wa mabadiliko ya kiuchumi ili taifa liwe la kipato cha kati.

Alisema ipo haja kwa taifa hili kuhakikisha kwamba linatumia vyanzo vyake vya kifedha kubadilika kutokana na hali halisi ilivyo kwa sasa.

Aidha alisema ipo haja ya kuzingatia mipango madhubuti ya kuondoa umaskini na kulinda mazingira, mambo ambayo yapo katika mpango mkakati wa Umoja wa Mataifa wa UNDAP wa maendeleo kuanzia mwaka kesho hadi 2021.

Samia Suluhu Hassan katika Kampeni za Kuwania Ugombea Mwenza wa Urais , jijini Arusha

mgombea mwenza wa nafasi ya urais  Bi. Samia Suluhu akiwa anawahutubia wananchi wa mkoa wa Arusha katika viwanja vya Samunge vilivyopo jijini hapa

 wananchi walioudhuria katika mkutano huo 

 mgombea mwenza wa nafasi ya urais akiwa anacheza ngoma  iliyokuwa inapigwa na wamama wa chama cha mapinduzi walioudhuria mkutano huo

 Baadhi ya  makada wa CCM  ambao wamewahi kugombea nafasi ya ubunge wa jimbo la Arusha mjini na kushidwa kutokana na kura kutotosha wakiwa ndani ya mkutano huo

mgombea mwenza wa nafasi ya urais  Bi. Samia Suluhu akiwa ana mnadi mgombea ubunge jimbo la Arusha mjini  Philemon Mollel hii leo

 picha zote  na woinde shizza wa libeneke la kaskazini blog

CHADEMA Jimbo la Arumeru Mashariki yasambaratika ,Mjumbe wa Mkutano Mkuu ahamia na Vijana ACT mzalendo

Mjumbe wa Mkutano Mkuu CHADEMA Samweli Shamy aliyehama chama hicho na kuhamia ACT mzalendo kwa madai ya kunyanyaswa na kunyimwa haki yake Msingi ya kuwaletea wananchi maendeleo kupitia nafasi ya Udiwani wa Kata ya Nkwandurua ,mara baada ya kumaliza mahojiano na waandishi wa habari katika Ukumbi wa PIAZA Wilaya ya Arumeru

Mjumbe wa Mkutano mkuu CHADEMA Samweli Shammy,Arumeru Mashariki akielezea sababu za kuhama CHADEMA,

MJUMBE wa Mkutano Mkuu wa Taifa CHADEMA  na mwenyekiti wa Kata ya Nkwandurua Wilaya ya Arumeru  Samweli   Shami  akielzea waandishi wa habari sababu za kuhama CHADEMA akiwa  na Vijana zaidi ya 1000 wa kata ya Nkwandarua ,mkutano uliofanyika katika ukumbi PIAZA Nduruma ,Wilaya ya Arumeru.

MJUMBE WA MKUTANO CHADEMA Arumeru ,ahama na Vijana 1000 kwenda ACT Mzalendo

CHADEMA Arumeru yasambaratika ,Vijana zaidi ya 1000  wahamia ACT

Na Mary John  ,Arumeru ,Arusha

MJUMBE wa Mkutano Mkuu wa Taifa CHADEMA  na mwenyekiti wa Kata ya Nkwandurua Wilaya ya Arumeru  Samweli   Shami  akiwa na Vijana zaidi ya 1000 wa kata ya Nkwandarua wamehamia chama cha ACT Mzalendo kwa madai ya kunyanyaswa na kunyimwa fursa  za kutumia vipaji vyao kuwaletea wananchi  maendeleo 

Mjumbe huyo akizungumza na waandishi wa habari  kwa niaba ya Vijana wenzake katika ukumbi wa Piaza Nduruma alisema kuwa Mbunge wa Jimbo la Arumeru Joshua Nassari na Katibu wa Wilaya ,CHADEMA  wameshirikiana kuwanyanyasa Vijana wa Jimbo hilo ikiwa ni pamoja na kuwanyanganya  nafasi za kuwania nafasi za udiwani 

Bw,Shami alisema kuwa  Mbunge Nassari hakubali ushindani na kuwa hataki kuona Vijana wenye uwezo wa taaluma wakiwania nafasi mbali mbali za uongozi ili wasaidie wananchi  badala yake anaweka watu kwa nguvu ,wenye kutetea maslahi yao .

Kimsingi alisema  kuwa lengo la kujiunga na CHADEMA ilikuwa ni kuweza kupata fursa ya kutumia elimu na uwezo aliyonao ili aweze  kuwaletea wananchi maendeleo 

Shamy alisema  kuwa kitendo  cha CHADEMA  Jimbo la Arumeru Mashariki kuwakata watu wenye uwezo na waliochaguliwa katika kura za maoni ni uonevu ,na kuwa hawawezi kuendelea kuona uonevu huo na kudai kuwa wananchi na wafuasi wanamuunga mkono wamebariki  ahamie chama chochote .

Alisema kuwa amehamia chama cha ACT mzalendo na kuwa anatarajia kuwa kupitia Chama hicho atawaletea wananchi maendeleo .

Pamoja  na mambo mengine  alisema kuwa wafuasi wake na wananchi wanamuunga mkono ,wameondoka  CHADEMA na kujiunga ACT mzalendo baada ya kuchukizwa na mwenendo na vitendo vinavyofanywa ndani ya chama hicho .

Fadhili mboya  Mwenyekiti wa Vijana kata ya Nkwandurua  CHADEMA  akizungumzia hatua hiyo alisema kuwa wanachukizwa na vitendo vinavyofanywa na Mbunge Nassari na kudai kuwa wanaungana na Mjumbe wa Mkutano wa Taifa CHADEMA kuhamia ACT Wazalendo 

Mboya alikiri kuwa Mbunge Nassari ameonyesha  ubabe wa wazi kwa kuwanyima watu waliochaguliwa katika kura za maoni nafasi ya kugombea nafasi za udiwani na kuwapatia watu ambao walipata kura ndogo  kitendo walichodai kuwa ni ubakaji wa demokrasia 

Lukas Kaaya ni kiongozi mwingine ambaye amenyimwa nafasi ya kuwania nafasi ya udiwani kwa kura 61 akiwashinda wenzake wanne lakini nafasi hiyo  amepatiwa  mtu ambaye aliyepata kura ndogo na kudai kuwa anahamia chama cha NCCR Mageuzi ikiwa ni kusaka haki yake ya msingi ya kuwaletea wananchi maendeleo.

Kaaya alisema kuwa wananchi wa Meru wanatambua uwezo wao na watawapatia kura ,na kusisitiza kuwa vitendo vya uonevu vinavyoendelea ndani ya CHADEMA Jimbo la Arumeru Mashariki vitaendelea kuvunja chama badala ya kuimarisha .

Vijana hao wamewataka wananchi kuwaunga mkono ,na kudai kuwa kuhama chama ni haki yao ya Msingi baada ya kuona matarajio waliyoyategemea hayajafikiwa .

Mwisho………………………………………………………………………………………………

Lowassa ni tishio kwa wenzake waliotangaza nia

January anena adai atateua Mawaziri wa 5 akichaguliwa Rais Is Possible ?

Mwenyekiti wa Jumuiya ya Wazazi Akabidhi Pipiki, Jijini Arusha

Mwenyekiti wa jumuiya ya wazazi Mkoa wa Arusha na Mbunge wa Afrika Mashariki  Mh.Bernard Murunya akikabidhi Pikipiki akiwa ni mgeni rasm , akimkabidhi moja ya Pikipiki kwa katibu jumuiya ya wazazi Wilaya ya Arusha Rehema Mohamed jana nje ya  Makao makuu ya chama  hicho jijini Arusha,  Pikipiki hiyo  ni miongoni mwa Pikipiki Saba zinazotakiwa kugawanya katika Wilaya za Mkoa wa Arusha

Matokeo Makubwa sasa kwenda na Ajira za Watendaji

Matokeo Makubwa sasa kugharimu ajira za Watendaji ,Mulongo aapa kuwachukulia hatua watendaji wabovu

Na Mary Mwita,Arusha .

NI jambo la kawaida kuona viongozi wakuu wa Serikali kuzuru miradi ya maendeleo na wakati mwingine kukemea na kutoa ushauri wa jinsi ya kutekeleza miradi hiyo hatimaye kunufaisha walengwa ambao ni wananchi wa maeneo husika .

Baadhi ya watendaji wanapata wakati mgumu wakati  miradi hiyo ikitembelewa kutokana na miradi husika kufanya kwa kiwango cha chini ,na hivyo kuzua mjadala na misuguano baina ya mamlaka husika

Jukumu la kuhakikisha miradi inatekelezwa katika kiwango kinachokubalika ni la kila mdau wa maendeleo ikiwa ni pamoja na wananchi  wa maeneo husika .

Mpango wa Matokeo makubwa sasa (BIG RESULT NOW) kwa sasa ndiyo unawafanya viongozi wa Serikali kukuna vichwa ,kwa kuangalia miradi ambao imewekwa katika mpango huo inatekelezwa na hatimaye kuharakisha maendeleo .

Miongoni mwa Viongozi hao ni Mkuu wa Mkoa wa Arusha Magessa Mlongo ambaye anasema kuwa ikiwa viongozi na watendaji wa Halmashauri za Wilaya Mkoa wa Arusha watashindwa kuwajibika na kuhakikisha kuwa vipaumbele kama vile Maji ,Elimu ,Mapato ,Kilimo Nishati  inafanikiwa kwa kiwango kikubwa ,atakuwa wakanza kuwachukulia hatua kabla ya yeye kuchukuliwa hatua

Mlongo anasema kuwa Viongozi wanapaswa kuwa mfano katika utekelezaji wa miradi ikiwa ni pamoja na kuandaa mashamba ya mfano  katika makazi yao ili wananchi wajifunze kutoka kwao .

Mkuu huyo anasema kuwa baadhi ya viongozi  ni wavivu ,na hivyo kuwafanya wananchi kushindwa kujifunza mema kutoka kwao,kitendo alichodai kuwa hakiwezi kuvumiliwa hata kidogo.

“Niseme lazima tuwe mfano bora ,wa kuigwa tuwaongoze wananchi kufikia malengo ya mafanikio ,mfano suala la kilimo katika maeneo mbali mbali hapa Arumeru wananchi kila mwaka wanakosa mvua ,wanalima mahindi ,ifike mahali wahimizwe kulima mazao yanayostahimili ukame ,kama vile mtama na mihogo ,waache kungangania zao moja.”anasema Mlongo

Mlongo anasema kuwa wananchi wanahitaji kuona mabadiliko ya maisha yao ,na kuwa wataweza kuwa na maisha bora ikiwa wataongozwa kufanya shughuli zenye manufaa zitakazo waingizia kipato na kuongeza pato la familia yao .

 “Watendaji wa Halmashauri   kwa kushirikiana na madiwani wanajukumu kubwa la kuhakikisha kuwa wananchi  wanapata maendeleo   kupitia vyanzo mbali mbali vya mapato ya ndani na nje ya Halmashauri hiyo .

 Mlongo katika ziara zake  alipiga hodi katika Halmashauri ya Arusha  na kufanya mazungumzo na watendaji wakuu wa Halmashauri hiyo ,kuhusu Matokeo makubwa Sasa                                                                                                                                                                                                        

Mkuu huyo anawataka watendaji hao kujipanga kuhakikisha kuwa wanashirikiana na wananchi kuboresha sekta hizo ikiwa ni njia yakuharakisha maendeleo na kuwapunguzia wananchi umaskini kwa kuwaondolea kero sugu .

Mkuu huyo akiwa katika Halmashauri hiyo anapata fursa ya kuzindua gari lilonunuliwa na Halmashauri hiyo kutokana na mapato ya ndani maalum kwa ajili ya idara ya elimu .

Mkuu huyo anataka gari hilo litumike kufuatilia maendeleo ya elimu katika Halmashauri hiyo ikiwa ni pamoja na kufuatilia mahudhurio ya wanafunzi na walimu katika Halmashauri hiyo .

Mara baada ya kufanya mazungumzo na watalaam hao anazuru miradi ya maji katika Halmashauri hiyo katika baadhi ya kata na kufanya mazungumzo na wakandarasi aliowakuta katika miradi maji 

Mlongo anapata ufafanuzi wa miradi hiyo kutoka kwa Mhandisi wa maji Bi Bahati ambaye anatoa ufafanuzi wa jinsi miradi hiyo inatekelezwa .

Aidha ziara hiyo inapambwa na viongozi wa Halmashauri ya Arusha ikiwa ni pamoja na Mkuu wa Wilaya ya Arumeru Mnasa Nyerembe ,Mwenyekiti wa Halmashauri hiyo ,Saimon Saningo ,na Makamu Mwenyekiti Anna Msuya na watendaji wengine wa Halmashauri

Mkuu huyo anaeleza kufurahishwa na utekelezaji wa miradi hiyo na kutaka wakandarasi hao kumaliza miradi hiyo kwa wakati ikiwa ni kuwaondolea wananchi kero ya kusaka maji .

Mlongo anawaonya viongozi wanaokwamisha miradi ya maendeleo katika Halmashauri ya Arusha kudai kuwa hatasita kuwachukulia hatua za kisheria

Mlongo anasema kuwa viongozi kama hao hawahitajiki katika jamii ya watu wastaarabu wanaowatakia wananchi maendeleo .

Hata hivyo Watendaji wa Halmashauri hiyo wanafanya kila jitihada kuhakikisha kuwa wananchi wanapata maendeleo na kuupa umaskini kisogo 

Katika kutekela kwa vitendo  Baraza  la Madiwani wa Halmashauri ya hiyo   limepitisha bajeti ya Tshs.37,319,148,736 ikiwa ni fedha zinazotarajiwa kupatikana katika vyanzo mbali mbali vya mapato ya ndani na nje ya Halmashauri hiyo kwa ajili ya kutekeleza miradi ya maendeleo

Mkurugenzi Mtendaji wa Halmashauri hiyo Fidelist Lumato iliyosomwa na ,bajeti hiyo  ni ya mwaka fedha 2014-2015.

 Lumato analiambia Baraza la madiwani kuwa fedha hizo zitapatikana katika mchanganuo wa mapato ya Halmashauri  billion 2,707,659,500,Ruzuku ya  fidia ya mapato   431,083,000,ruzuku ya mishahara  Tshs 27,255,089,820  ,ruzuku ya matumizi mengineyo Tshs.2,720,568,000, na miradi ya maendeleo na wafadhili Tshs 4,734,884,416  .

 Anafafanua kuwa Halmashauri hiyo inakisia kutumia Tshs.37,849,293,736 ikiwa ni matumizi ya mishahara ,matumizi mengineyo ,michango ya Halmashauri katika miradi mbali mbali ya maendeleo ,ruzuku ya mishahara ,matumizi mengineyo ya Ruzuku ,miradi ya maendeleo na ruzuku .

 Bwana , Lumato anasema  kuwa kutokana na ukomo wa bajeti hiyo Halmashauri imelazimika kuleta maombi maalum kwa ajili ya miradi ya vijiji 19ikiwa ni kiasi cha Tshs Billion 5,455,978,106.36

Miradi mingine iliyoombewa fedha ni mradi wa ujenzi wa Jengo la wagonjwa wa nje (OPD) Hospitali ya Wilaya Tshs 1,800,000,000, ujenzi wa Sekondari  Tshs.200,000,000 ,Ujenzi wa Hostel za Sekondari –maeneo ya wafugaji Tshs.200,000,000,

Nyingine ni ukamilishaji wa Jengo la Halmashauri Tshs.200,000,000 ,ujenzi wa Vivuko Tshs .800,000,000 ,ujenzi wa Bwawa la kukinga maji mafuriko Tarafa ya Mukulat,pamoja na kufanya upembuzi yakinifu wa maeneo

Baraza hilo lilipitisha Bajeti hilo kwa sauti ya pamoja na kutaka watendaji kutekeleza wajibu wao ikiwa ni pamoja na kutekeleza miradi ya maendeleo na kufuatilia mapato ,ikiwa ni kuwezesha Halmashauri hiyo kupata mapato kwa wakati na kutekeleza miradi ya maendeleo .

 Mwisho………………………………………